عراقي فى المهجر

بعد ما ريد فيزه ولا لجوء انـــــسان
عمت عين الاقامه الدنست صـــــيتي

واشكر كل صديق وكل خوي وكل جار
قــفل بابه ورفض يـــقبل عراقيتي

خلف الله عليكم والوكـت دولاب
لا بد يوم يـــنزل بيكم ارضيتي

لان اول امس كل البشر خــدام
جانوا للـعراق واكلوا ابيتي

جان الضيف عندي مكرم ومهـيوب
فوگ الراس اشـيله وهاي تربيتي

ما داعي اسولف وانه ابو النـهرين
ياهو الـما سمع اخـبار حنيتي

بعد بصـمات اديهم والطبع موجود
من جانوا جياع بوسـط صيـنيتي

يـا دنيه حرام ومـنكر ومـكروه
اذا ابـن الـعراق الـيوم وطيتي

معـقوله نسيتي اسم الـعراق بساع
لـو مثل الـبشر همّن تـناسيتي

ميفيد الحچي ولا تـنفع الچلمات
راجع يـا وطن لترابـك الزيـتي

راجـع يـا حـبـيبة گـلبي يا بغداد
وادرى بكـثر ما ونـيت ونيـتي

وادري لوحّدج عفناج صار سنين
وادرى من الحزن تابوت سويتي

جيب الاغتراب وحـطه بالـتابوت
يا غربه الـعراق شكثر اذيتي

ما اعيش ابّحر مالح طـعم يا ناس
انه بسجن الـفرات وفقط حريتي

وترابي ذهـب والگاع من ياقـوت
ومن ثوب الكرامه البسهه بيريتي

واذا گالوا لترجع والوضع مو زين
اگول اني الوضع والزين تاليـتي

وميهمني بعد ليصير خلي يصير
طعم الموت اشرف من هجر بيتي

اموت بوسط خوتي ويا حلاة الموت
من اجمع اهلـنه واكتب وصيتي

وصيتي لو متت لتچفنوني چفان
لفوني بعلمنه وهاي امـنيتي